عـ ... يــ .. د

- بكرة عيد
= أعلنوه رسمي ؟
- ايه الخضيري " قزه "
= والشيعة ؟
- قلعتهم
= والفلكيين ؟
- قلعتهم بعد
= الرؤية ما تحتمل معنى العلم ؟
- لا ، لأنه يقول لك " صوموا لرؤيته وأفطروا لرؤيته "
= ايه والله إنك صادق . وديت ثوبك للمغسلة ؟
- بوديه بس بعد ما أحلق
= ايه الله ياخذهم مدبلين الأسعار
- السكسوكة بعشرين !
= واللحية بعشرة !
- ياحظ المطاوعة بس
= ترى المغسلة زحمة !
- مغسلة السيارات ولا الملابس ؟
= كلهم
- الله يستر
= كيف شغل الخياط
- يمشي الحال
= عساه ما طمع فيك ؟
- بدري عليه !
= ومتى بتنام الليلة ؟
- والله مدري ، بس جوعان !
= هات لك سندوتشات
- شوي مو الحين
= ترراه بيسكر بدري لا تحسب انك برمضان !
- ايه والله صادق !
= طيب نجيب سندوتشات ايش ؟
- ما ودك بكبسة ؟
= معاك
- طيب خله شوي تونا مفطرين
= تراهم بيسكرون .. لا تحسب إنك برمضان !
- ايه والله صادق !
= متى بيجون الرجال بكرة ؟
- من عقب صلاة العيد لين ثمان ولا تسع
= ونرقد عقبها ؟
- بس نصحى العصر يمكن يجون رجال
= مو تقول لين تسع ؟
- فيه فلان ما يجي الا العصر
= ايه والله انك صادق
- يعني ما فيه نوم الحين
= بتصلي العيد
- استغفر الله أكيد
= وأنا بعد
- عند أي جامع ؟
= فلان خطبته ما تطوّل
- فلان خطبته زينة
= معاك
- وراك ما حلقت للحين ؟
= حتى أنت ما حلقت !
- زحمة
= ايه والله إنك صادق
- القناة الأولى ما غيروا أغنية " فرحة فرحة " للحين ؟
= ليه يغيرونها ؟
- أبو نورة ما سوى وحدة جديدة ؟
= يمكن ما عجبتهم !
- يمكن ما سوى أصلاً !
- يمكن !
= خوجة يهنئ مين ؟
- الشعب
= والشعب فرحانين ؟
- أكيد !
= أنت فرحان ؟
- ايه بس أبغى أحلق
= لكن زحمة
- أكيد !
= يعني الشعب ما حلق ؟
- أكيدين !
= وخوجة محلق ؟
- ما يبيلها
= عقالي ضيق شوي
- وليه شريت عقال ؟
= مو تقول بيجون رجال بكرة ؟
- رجال الصبح الين 9 !
= وفلان يجي العصر !
- والله إنك صادق !
= وش قاعد يسوي بشار ؟
- شكله خايف
= يعني ما حلق ؟
- يمكن زحمة
= أنت تكرهه ؟
- أكيد !
= يعني فرحان ؟
- ايه بس أبغى أحلق
= لكن زحمة
- من جد زحمة
= ترى أقرفونا هالبزران بالطرطعانات !
- لأنهم فرحانين
= يعني حلقوا ؟
- ايه أكيد !
= يعني ما فيه زحمة
- أجل شلون حلقوا ؟
= ايه والله إنك صادق .